الأحد، 7 يوليو، 2013

مابين ميلادى .... السيد أنور أبويا ... ورحيلك !!




بابا :)  مسائك ورد يالورد 
أنا طبعا بكلمك كل يوم وبحكيلك حصل ايه ليا وللولاد 
صحيح نفسى أسمعك زى زمان بس معلش مسير هيجى يوم وهترد عليا 
أنت عارف طبعا زى ماحكتلك أنى مشتركة فى حملة التدوين اليومى لمدة سنة 
بس اللى ماتعرفهوش أنى هعملك النهاردة بوست ليك .... أيوان بوست ليك يا لورد  ... وأيوان عارفة وفاكرة أنى مابحبش أكتب عنك ومابعرفش أكتب عنك بس ماينفعش أدون النهاردة عن أى حاجة غيرك لان مافيش حاجة مسيطرة النهاردة والليلة دى غيرك 
ومش عارفة أهرب منك الحقيقة 
الغريب أو الجميل أى كان التعبير أنها التدوينة الــ 7 يوم 7 \ 7 
وأن رقم 7 هو رقمى المفضل وعدد حروف أسمى واليوم نفسه عندى غير !!!!!  
:
:
:

مش هقول بحبك ووحشتنى والحاجات الرخمة اللى مابتوفيش أحساس البنى أدم  حقه دى خااااااااااالص , وانت عارف أنى عديت المرحلة دى من بعد وفاتك بأسبوع واحد وعلشان كدا مابتكلمش عنك ومابكتبش عنك , أصل ماحدش هيستوعب أنا جوايا أيه :)

فاكراك وانت بتحكيلى عن الصوردى (فرح خالى ) كان عندى سنة وكنت عيانة 

ماما : أبوكى تصورى يومها كان مصمم يقعد بيكى فى البيت !!!
أنا : أية دا ؟؟ ومايروحش فرح خالو أزاى ههههههههه ؟؟
ماما .. قوليلى والنبى يابنتى داكان أسمة كلام ؟؟!!
بابا : ما أنتى كنتى عيانة وسخنة أوى وكنت خايف أوى عليكى تسخنى أكتر من كدا  وماكانش ينفع أقول لسونا          
 (أمى ) تقعد بيكى وماتروحش فرح أخوها 
أنا : يا أبس (ابويا) أنت على طول كدا مكبر المواضيع ؟؟ أدينا روحنا وأتصورنا وفرحنا وأنا كبرت يا حبيبى و بئيت بغلة أهو وبتفرج عالصور 
بابا : على وشه أبتسامة عريضة وبيطبط على كتفى أه الحمد لله يا مارو 
ماما : يومها فضل شايلك يوم الفرح مش راضى يديكى لحد وانتى متعلقة فى رقبته تنامى وتقومى ...







عارف قلبى وجعنى علشانك ياسيد أه ووجعنى أوى كمان ..  مابحبش اتكلم عنك علشان يبنط سؤال فى دماغى زى دلوقتى كدا بالظظظظظبط  وبحبسة ماينطلقش على لسانى .. أصل ماينفعش أعترض ماعلمتنيش كدا ياسيد 
 المهم  ألف رحمة ونور عليك أسال الله العلى القدير أن يجعلك فى صحبة نبينا المصطفى صل الله عليه وسلم وآل بيته وصحبة أجمعين ليوم الدين ويجمعنى بك على خير :)

كل سنة وانت طيب يارب رمضان داخل زى ما أنت عارف  ويارب هديتى توصلك ياااارب 



قلم رصاص معدنى ذهبى اللون تخترقة خطوط طول وعرض سوداء ... حملتها خطوطة السوداء بين تموجها عبر أمواج الذكرى  حيث كان هو مازال موجود ... أبى أتمنى أن تهبنى هذا القلم للأبد فكم أحبة والبريق يملاء عيناها  ... هو مبتسم ومحتضن إيها ...ولكنك مازلتى صغيرة جدا حبيبتى عندما تكبرين سيكون ملك أبدى لكِ ... 
هى كبرت وأصبح القلم الذى طالما أبهرها وأحبته ملكية خاصة لها ... ولكنها الأن فقدت البريق و تتمنى رحيل القلم وبقاء من وهبها إياه !!!!!


هناك 21 تعليقًا:

الغاردينيا يقول...

تبقى الأشياء ويرحل أصحابها، هذه هي دنيا عزيزتي .

مستتِ قلبي وروحي، و أدمعتِ عيناي

رحمه الله على كل موتانا

ربنا يسكنهم الجنة و ينور قبورهم

ويرحمهم و يجمعنا بهم في الجنة .

وكل عام وأنت بخير ورمضان كريم يا عم السيد :)

Noha Saleh يقول...

مارو انا بكيت من الصور والكلام والحالة بتاعة التدوينة دى
ربنا يارب يرحمه ويغفرله ويجعل مثواه الجنة وان شاء الله هديتك توصله

richardCatheart يقول...

الغاردينيا :)

اللهم امين يارب العالمين

تعليقك جميل :) واجمل ما فيه ( وكل عام وأنت بخير ورمضان كريم يا عم السيد)

بشكرك من قلب قلبى ملأتى القلب بعيق الجاردنيا الأقرب للقلب عبق الغالين والاحباب عزيزتى :)

منورانى يا جميلة

richardCatheart يقول...

نى نى :)

اسفة والله ما احبش ابدا انى اكون سبب فى بكائك يا حببتى .. اشكرك ينهى على احساسك الجميل بيا مش غري عنك ابدا يا نهى ربنا يعز بالخير ويفرح قلبك ديما اللهم امين

واللهم تقبل دعائك ياااااااارب ويارب هديتى توصله أن شاء الله

منورانى اوى يا نهى

Aya Mohamed يقول...

تدوينتك تلمس القلب و تبكى العين
ربنا يرحمه و يغفرله يارب
وكل سنة وانتى طيبة و رمضان مغفرة لباباكى ان شاء الله

Hayat يقول...

"هى كبرت وأصبح القلم الذى طالما أبهرها وأحبته ملكية خاصة لها ... ولكنها الأن فقدت البريق و تتمنى رحيل القلم وبقاء من وهبها إياه !!!!!"

عندما نشعر باحساس قلما تفي الكلمات في التعبير عنه
اسكنه الله فسيح جناته وتغمده برحمته

و كل عام وانتِ بخير

تحياتي لكِ:)

asmaa fathy يقول...

مدونتك جميلة تمس ذلك الوتر الملىء بالشجن والمكابرة في آن واحد

ربنا يرحمة وكل سنة وانتي طيبة وكونى له تلك الذرية الصالحة التى لا تبخل عليه بالدعاء والصدقات

تحياتي

Gamal Abu El-ezz يقول...

ربنا يرحمه ويجعل مثواه الجنة

الذكريات الجميله مش بتتنسى وبالذات لو ذكريات طفوله يعنى مش واعين ليها لكن بتتحكى لينا يمكن دى بتكون فى ذاكرتنا أقوى من اى ذكرى أخرى وبتحسسنا بقيمة تلك الذكرى
وأكثر الذكريات حبا إذا كانت مرتبطة بالوالدين وخصوصا اذا دلت على اى مدى قد تبلغ التضحية من اجل وليدهم

بحيكى على التدوينة الرائعه وعلى الذكرى الجميلة
وكل سنة وأنتى بخير وسعادة ورمضان كريم

Ramy يقول...

ربنا يرحمه

مش هعلق

((:

هو انا أقرا و أعلق كمان

((:

كل سنة و انتى طيبة و تعيشى و تفتكرى دايماً

و كل سنة و الحج ريتشارد كدة بخير و سلامة و الأولاد سعداء و مبسوطين

و الصورة حلوة بالناس اللى فى الصور

و حلاوة روحهم

((:

وفاء سليمان يقول...

اولا كلامك باللغة العامية في تصوير احاسيسك ومشاعرك حلو جدا
ثانيا: مش انتي بس اللي متعذبة من نار فراق احب الناس علي قلبك فانا فقدت اعز انسانة في حياتي وهي امي هوني علي نفسك
ثالثا:رحم الله والدك وامي ويجعلهم في الجنة ونعمها ورحم الله اموات المسلمين جميعا: )

asmaa khalifa يقول...

آه يا مارو قلبي اتوجع فعلا :-( .. تدوينتك رائعة لأنها صادقة وغير متكلفة أو منمقة وضعتي فيها مشاعرك الحقيقية فأبدعتي رغم الوجع .. ولا يسعني أن أقول قي النهاية إلا ربنا يرحم والدك ويجعل مثواه الجنة

Bent Men ElZman Da !! يقول...

مش عارفة اقولك حاجة
بس إنتِ وجعتيني :(((
ربنا يرحمه ويغفرله ويرحم موتانا جميعاً ياااارب

richardCatheart يقول...

آية محــــمد

اشكرك جدا يا ايه ربنا يخليكى يارب دائما تدوينات من حب بصدق تصل للقلوب بصدق واللهم تقبل منك يارب يا حببتى

نورتى الدنيا

richardCatheart يقول...

حياة

اشكرك جزيلا واللهم تقبل منك يارب اللهم امين
كل حبى لكِ

richardCatheart يقول...

أسماء فتحى

اشكرك من كل قلبى يا اسماء انتى الاجمل

واللهم تقبل منك وأسأل المولى ان كون له كذلك اللهم امين ووالله مابخلت عليه يوم بحبى او صحتى او دعائى ولن ابخل عليه يوم بشىء حتى الادنى منه مالى

اكرمك ربى منورانى

richardCatheart يقول...

جمال ابو العز

صدقت والله يا فندم نحن نحيا على تلك الذكريات الرائعة سواء عشناها او سمعنها الحمد لله كل ذكرياتى رائعة معه حتى القاسى منها رائع ايضا

اشكرك وومروك هو الاروع دائما استاذى العزيز وكل عام وحضرتك وكل احبابك بخير يارب

منور الدنيا

richardCatheart يقول...

رامى العزيز

انت وجودك بالف تعليق وانت عارف يارام :)

يارب ينعاد عليك وعلى كل حابيبك ومصر كلها بالف خير يارب ولا يحرمنا من طلتك الكريمة الطيبة علينا والكل بيسلم عليك والله :)

منور مكانك يارام :)

richardCatheart يقول...

وفاء سليمان

حبيبتى الغاليه ربنا يطبطب على قلبك ويعوضك كل الخير عنها يارب بخير الثواب والصبر والله بهون بس غصب عننا التهوين مابيهونش يا وفاء احنا بشر :)

اشكرك اوى على كلامك الجميل وسعيدة ان الاحساس وصلك والله ربنا يخليكى

اللهم امين ربنا يتقبل منك خير الدعا

منورة الدنيا

richardCatheart يقول...

اسماء خليفة

الف سلامة على قلبك الف بعد الشر واسفة والله انا مابحبش اتعب حد بوجع نفسى بس الكتابة عنخ مهما حاولت اخليها مبهجة بتطلع غصب عنى بوجع اشكرك غاليتى واللهم تقبل منك يارب اللهم امين

اسعدنى مرورك جدااااااااا

richardCatheart يقول...

احلى بنوتة من الزمان دا

اسفة يا دوندن والله ربنا مايوعجك ابدا وماتقوليش لان اللى عندك حاسة وواصل

اللهم تقبل منك يارب العالمين

منورة الدنيا

ندى الربيع يقول...

أولاً كل سنة وانتى طيبة
وثانياً ليكى منى الف تحية وتقدير على أسلوبك فى الحوار ده والكتابة الجميلة أوى دى كلامك بيوصل لقلبى ع طول انتى رائعة ربنا يسعدك ويفرح قلبك اللى حاسه انه حزين لو كان احساسى صح اقولك حاجه لو كنتى أم فزيلى الحزن من جواكى فكفاية تحسى بضحكة أولادك وتشوفى البسمة على وشهم ده بالدنيا كلها الأطفال هم بسمة الحياة حتى لو فقدنا كل شئ ...