الثلاثاء، 8 أكتوبر 2013

ذا هــــــــــــانـــــــــدرد ..... hundred


صباح الخير أو الورد أو الفل أو الياسمين اللى يحب حاجة يختارها :)

يمكن النهاردة كنت هنزل خاطرة عادية ياعنى من بتوعى  بتوع ( انا بموت فيك .. اه والنبى أرحم عذاب عنيا . او الفراق قتلنا يا سى السيد يا خويا .. )

بس قولت أغير علشان الملل وعلشان الحدث الجلل 
النهاردة اليوم الــــ 100 ... ذا هاندريد  وطبعا ترجمة ذا هاندريد (الأيد الحمرا ) 
عدوها الايد الحمرا :)

لما كنت بتسأل إيه الأنجاز اللى حققتيه ؟؟
كنت يا بسكت .. يا بقول مافيش 
بالرغم ان فى حاجات كتير فى حياتى وبعمل حاجات كتير فى حياتى واصلا زحمة ودوشة حياتى وبقالها كتير على كدا 
وفى ناس شيفين إنى عملت اللى متعملش فى حياتى 

بس كلها حاجات واجب عليا لحد فرض عليا لحد لازمة منى لحد 
إلا التدوين  هو الحاجة الوحيدة اللى ليا 
النهاردة ممكن لما أتسأل أرد ...
كتبت 100 تدوينة متتالية فى 100 يوم
!!!!!!!!!!!!!!!!!!!!

دا أنجازى الشخصى !!! ايوا وسعيدة به جدا 

أنا قدرت أعمل حاجة مش متعودة عليها وهى الروتين اليومى لشىء 
اللأهم من دا الأستمراريه والصبر عليه وكل دا مش من صفاتى 
ومعنى انها حصلت يبئا كانت موجودة فعلا بس انا  اللى مش شايفها أو ماكنتش شيفاها 

يمكن علشان كدا دخلت التجربة عايزة العب مع الوقت او الزمن وعقارب الساعة اللى بتقتلنى بلتغتها وتكاتها 
عايزة اشوف الوقت هيظهر ايه فيا وانا هنا بسجل كلام اه كله حب او اغلبه حب مش شىء يومى للبشر او احداث لكن ورا كل حاجة كتبتها حدوته سواء اخترعتها او عشتها او شوفتها 
وكل تدوينه بتفكرنى بموقف وشىء حصل سواء له علاقه بالتدوينة او لاء مالوش 

تدوين يومى ل 100 يوم هو تأريخ بشكل مباشر أو غير مباشر لحياة أنسان فرح وجع قلق تفكير اخفاق ونجاح  يمكن ميهمش ناس كتير أو ماتهمش حد أصلا 
بس على الأقل بتهم الشخص نفسه ودا كافيه 


مدونتى الأصلية ( قلب القطة ) من 2010 أبتديت أكتب فيها بعد الأطلاع والتطرح والجمع و نبعد عن الضرب علشان الصحة بس 
نشرت فيها 147 بوست كتابه بعيد عن نشر لينكات الحوليات 

ياعنى 47 يوم كمان  وهبقى اللى عملته فى 3 سنين ونص عملته 147 يوم !!!!!!!!!!!!

ودا اسعدنى  جدا ... 
أنا حاولت على مدار 100 يوم  مكنش حد مكرر حاولت بس مشكلتى انى مابعرفش أكتب غير اللى بحس به وبس سواء يخصنى او يخص غيرى او شوفته لازم اكون حاسه  علشان اعرف اشوفه اؤدامى واعبر عنه ويوصلكم 

الحقيقة عندى مشكله نفس الاحساس بتاع انا بكتب لنفسى اه بكتب لنفسى ومبسوطة اوووووووووووووى ان نفسى بتجى هنا وتقرا 
 مش مستنيه تعليقات كتير او قليل  اه بسعد بالردود وخصوصا شخصيات معينه هى عارفه نفسها كويس :)
 بس فى الأخر أنا بكتب لان فعل الكتابه نفسها بيريحنى بحس انى بزعق بصوت عالى ومش مهم مين يقول ايه فين :)


فى حاجة مهمة اه انا بحب الصور والتصوير بس انا اغلب الحاجات اللى بكتبها وخصوصا خلال ال100 تدوينه اللى فاتوا مش حاجات على صور  لالالا دى حاجات اتكتبت ارتجاليه فى وقتها ممكن قبلها بيوم او اتنين بالكتير ممكن و شوفتلها صورة مناسبة  فى طبعا حاجات اتكتبت مخصوص لصور معينه وبعنها بس دا نادر فى ال100 تدوينه دول الحقيقة 


اه لسه زهقانه ومليت من التدوين اليومى ومش عارفة ولا فاهمة ليه !!!!!! بالرغم انه لحد دلوقتى مش مشكل عليا اى عبىء بجد
بس هى طبيعة البشر او انا بالذات كدا كارهه للنمطيه بس مستمرة علشان نفسى تقرا كل يوم :)


فى ال100 يوم تدوين ماتبعتش كتير الحقيقة رغم اكتشافى لمواهب تدوينيه راااااااااااائعة واكتر من رااااااااااااائعة ومنهم اللى بهرنى 

بس ماليش نفس  لشىء ومافيش قدرة على المتابعة و زغزغة المخ والروح الحقيقة  ودا حرمنى من قراءة حاجات جميلة اوى بس ربنا يحينا لسه ال 100 الجاين هحاول رغم انى المفروض ابتدى اركز واشوف الكليه واتنيل اذاكر بس اكيد هحاول اقرا التدوينات اللى هتستمر ان شاء الله 


أما أنا هستمر ل امتى ؟؟؟ الله اعلم ... لما يجف المخ والقدرة  أكيد هتوقف أتوماتك وأكيد اى حد بيتابع هيشوف دا 

انا لسه بعتبر نفسى فى كى جى وان كتابه زى اول يوم دخلت التدوين وماكنتش كتبت قبلها حاجة 

لسه ضعيفة فى اللغة وبحاول أثقلها قدر استطاعتى ولسه عندى أخطاء أملائيىة ولسة بكتب اللى بحسه وبرتجله وبس  ولسة بتعلم منكم كلكم من غيركم :)

بدى نفسى 4 من 10 :)

 (ملاحوظة مئلوظة للذكرى والتذكرة )

امبارح كان أول يوم ليا من سنة اضحك من قلبى واعيط من قلبى و كأنى كنت  متجمدة خلال السنة  أو ميتة وصحيت !!!!

فالحمد لله رب العالمين حمد كثيرا مبارك 

اللهم لك الحمد كما ينبغى لجلال وجهك وعظيم سلطانك

أنا عارفة أن ماليش غيرك يا كريم


(المتابعين )

شكرا اوووووووووووووووووووووووووووووووى على ـهتمامكم ومحاولات دعمى شكرا لكل حد ضيع من وقته وجهده وقراء سطرين تلاته ليا سواء ساب تعليق او لاء  يمكن الناس هنا  بردو سبب من اسباب استمرارى انتم بتدعمونى نفسيا من غير ماتحسوا 
اشكركم من كل قلبى وليكم منى كل الاحترام 



( لبنى أحمد ) 

شكرا خاص ليكى ومليون تحيه على المجهود فى الحوليات حقيقى ربنا يوفقك من جميل لاجمل يا جميلة


كل 100 يوم وانتم كلكم طيبين :)


بس خلاص شعبولا استايل :)





هناك 9 تعليقات:

Gamal Abu El-ezz يقول...

أنا سعيد جدا
لسببين على وصولك للتدوينة المائة
وعلى رجوع البسمه ليكى والى باينه فى كتابتك
عقبال التدوية المئتين وربنا يديم عليك السعادة ويوفقك فى حياتك

ومبروووووووووووووووك التدوينة ال100

تحياتى

P A S H A يقول...

انتي عديتيني (من العدوى) بسعادتك
:)))
ربنا يفرح قلبك دايماً يا رب ويزيدك فرح كمان وكمان وتستمري في تدويناتك الجميلة
:)))

omar f. يقول...

اسعدك الله دوما اختى الفاضلة
ومبارك لك تدويناتك المئة
لك لك التقدير والاحترام

richardCatheart يقول...

جمال ابو العز

يا مساء الورود :)


هيييييييييييييح الحمد لله يا جمال يمكن رغم ضعفى البشرى النفسى الا ان يقينى الداخلى بربنا عز وجل عمرة مخذلنى رغم تقصيرى الانسانى


انا سعيييييييييييدة حد الانتشاااااااااااااااااااااااااء
هههههههههههههه

ربنا يخليك ويبارك فيك يارب ومايحرمنيش من طلتك الحلوة الطيبة اخى الكريم الخلق ابداااااااااااا

ولك مثلما دعوت واكثر اللهم امين يارب العالمين

منور الكون كله :)

richardCatheart يقول...

بااااااااااااااشاااااااااااااا


اولا انا اسفة ماردتش على تعليقك اللى فات رغم حلالالالالالالالالالالاوته الششششششششديده والله اعذرنى


انا اعديك ازاى ؟؟؟ اذا كنت انا لما بحب ابتسم او اسعد بدور على هجايص علشان روحك الحلوة ودمك الشربات يسعدنى ياخى هههههههههه دى شهاده يا اخوااااااااا وبعدين زى ما بغم عليكم ببوستات تسد النفس لازم لما اتبسط تتبسطوا معايا اؤمال ياعنى فى همى مدعين وفرحى منسيين عيب اشريف اخويا احنا اسجنجرانية بردو

ربنا يسعد ايامك ويفرحك ب يس وهو فى افضل حال انت واميرة

السلام امانه ليهم وبوسهملى اوى ويارب عيد سعيد عليكم يا باشا وسيد البشوات كمان :)

منور الكون

richardCatheart يقول...

ام عمر

مساؤك هناء اللهم امين


الله يبارك فيكى ويهنيكى ولكى مثلما دعوتى واكثثثثثثثثثثر اللهم امين اختى الفاضله

منور الكون :) لكى كل الحب والود

tarek muslim يقول...

حلو أنو التدوين اليومي حققلك هدف بحد ذاته ... رغم أنو هدف عادي , لكنه هدف ليك ِ وحدك ... حلو كده

richardCatheart يقول...

tarek muslim


صباح الفل لحضرتك

بالظبط يمكن يبان زى بسيط اوى وعادى جدا وخصوصا الكتيبة اللى بيكتبو بستمرار درر انما هو شىء مهم وعظيم ومختلف بالنسبة اللى نفس الشىء هتلاقيه فى حاجات تانيه العكس زى بسيط جدا ليا عظيم تحقيقة ليك اللى يهمنى هنا فو الخصوصية الشىء دا لمين بنسبة كام ؟؟


منور الدنيا فى ال100 :)

Ayman Khaled يقول...

برافو عليكي وإلي الأمام دائما إن شاء الله